有個細路仔，一家四口，爸爸、媽媽加細佬，幸福四人組。
可惜小學時候，某天爸媽無厘頭為小小事火拚，老爸牛精兼火遮眼，一巴掌摑在媽打的臉上。
劇情急轉直下，阿媽唔係人咁品，你冇面俾，我立刻離婚！
唔係掛，駛唔駛咁大反應？
但係阿媽冇偈傾，不久家變，細路仔同佢細佬，從此變成單親一族，跟住阿媽賣樓搬屋。
細路仔覺得做人咁化學，話散就散，人生好灰色，於是跟屋村的江湖人物、邊緣青年，出出入入，粗口橫飛，天天搞搞震。
中一那年，學校請已故影帝喬宏叔來分享（佢當然係講主耶穌），加上親戚相勸，細路仔聽到詩歌：「祂救了我，從罪中釋放我…使我黑夜變成白晝」，於是接受基督的大愛。
細路仔學校D成績，向來都高唱滿江紅，全級144人考第126名，羞愧得無地自容。唔想成世冇前途，他信耶穌後頭一次鼓起勇氣，誠心祈禱，要革面洗心，求主幫助。
講起又幾奇，中二開學，班主任無端端欽點他做班長！ 細路仔立覺責任重大，全力奮鬥。有一次校方見家長，人之常情，阿仔梗係企埋門口「裝裝下」。
慘，阿媽喊到烏下烏下…
媽打步出教員室，佢話唔喊唔得–咁多年來，從未有人讚我個仔咁好！
細路仔靠耶穌鼓舞，懷大志奮鬥，後來考入大學，成為社工，鋤強扶弱，還與一班老友組成福音樂隊，作曲填詞，到處勵人心志。
回頭看，當日自己在人生交叉點，他說：「正當兩個會–黑社會和教會–都向我招手時，我一念之轉去教會，才有今日的收成。」
問他可曾寬恕媽媽，他說幾年前，媽打忽然要動大手術，細路仔探望安慰，留下名著「荒漠甘泉」。母親讀了，內心得享平安，誠心歸依基督，母子間的隔膜也消失了。
「…神阿，憂傷痛悔的心，你必不輕看。」（詩篇五十一篇17節）
「應當一無掛慮，只要凡事藉著禱告、祈求和感謝，將你們所要的告訴神。神所賜出人意外的平安、必在基督耶穌裡、保守你們的心懷意念。」 (腓立比書四章6-7節)
Recent Comments