有冇養過狗？
如果你係愛心狗主，又睇過「小Q」，必定體驗過其中哀樂。
狗與人一樣，有生老病死，會情緒低落，會離家出走。不少狗主猶如父母，無微不至，甚至因喪犬而抑鬱難眠，幾個月都非常之唔開心。
曾經有超級狗主，為尋失蹤的愛犬，懸紅70 萬大元；即使有人送還狗屍，也願打賞30萬！外國更有人寧願把遺產留給忠心的老狗，也不願分給配偶！
為了一條狗，主人四圍走，無他嘅，只因有感情。新聞報道過有位女士，大雨天的日子，見流浪狗落難街頭，她動了慈心，苦苦守候幾小時，最後將狗接回家同住。
不過，狗的世界和人的社會，十分雷同。狼心狗肺、狗咬狗骨、恩將仇報的惡犬，無處不在。
我曾有一位老師，收養「生滋」兼跛腳嘅大黃狗，日日親自塗藥餵飼，救回狗命，改名「多利」。不料有天多利食食吓狗糧，老師唔覺意拉動咗狗兜，多利以為搶食，一口狂咬救命恩人！老師犧牲受苦，手背從此留下傷痕。他痛懲惡犬，幾乎把牠逐出家門。
多利從此明白自己「得救」唔係奉旨，乖乖回頭。
另一件失犬事件簿，更加峰迴路轉。早一段日子，新界有位狗主回家，發現狗竇被歹徒偷襲，愛犬剛被擄，慘遭壞人開車劫走。
狗主難捨難離，立刻飛跳上車，以頭文字D嘅極速飄移，窮追狗賊，足有 40公里，從元朗飛車追到上水，終於尋回三隻拿破崙犬！
人狗情深，總算團圓結局。
人比狗貴重多了！地球上人口超過六十億，據統計從古至今，生存過嘅人共二百億。如果人對狗都咁長情，何況天上的父神，就更愛我們！所以「神愛世人，甚至將他的獨生子賜給他們，叫一切信他的，不至滅亡，反得永生。」(約翰福音三章16節)。
因著愛，真神降世，做了兩件大事：「祂尋找、拯救失喪的人。」(路加福音十九章10節)把你從魔鬼的手下奪回，醫治你的心靈，更要與你同在同行，直到永遠！
今天你願與祂同行，還是流浪下去、苦過 di di?
Recent Comments